ტრენინგის მეცხრე დღე

ტრენინგის მეცხრე დღეს მონაწილეთა მიერ წარმოდგენილი პორტფოლიოს პრეზენტაციები იყო ყველაზე საინტერესო და მარავალფეროვანი აქტივობებით დატვირთული, რადგან ეს პროცესი ყოველ კონკრეტულ მონაწილესაც გამოუმუშავებს ეფექტური პრეზენტაციის უნარებს და ამასთან ერთად კოლეგების ნაშრომების მოსმენა-დათვალიერება გვაძლევს გამოცდილების გაზიარებისა და გამდიდრების შესაძლებლობას. განსაკუთრებით საინტერესო ხდება უკუკავშირი. პრეზენტაციის პროცესში ნათლად წარმოჩნდება პროექტის ძლიერი და სუსტი მხარეები, რაც სამომავლოდ დამეხმარება დახვეწილი პროექტების მოფიქრებასა და რეალიზაციაში.
საბოლოოდ კი ვიტყვი, რომ ინტელის მესამე დონის ტრენინგის დასრულება ჩემთვის გულდასაწყვეტია, რადგან ამ მოდულმა ძალიან ბევრი შემძინა და ვფიქრობ, ეს არ იქნება "დაძინებული" ცოდნა, არამედ რეალურად გაცოცხლდება ჩემს პრაქტიკაში. უღრმესი მადლობა მასწავლებლის სახლს, ინტელს, არაჩვეულებრივ ტრენერს, ნინო მარღიშვილს და კოლეგებს ესოდენ საინტერესოდ გატარებული საათებისთვის და მიღებული ცოდნისთვის.

ტრენინგის მერვე დღე

ტრენინგის მერვე დღე პროექტის მონაწილეთა დიფერენცირებული სწავლების დამხმარე მასალის შექმნას და პორტფოლიოს ბლოგზე განთავსებას მოვანდომეთ. ინტელის ელექტრონული სახელმძღვანელოს რესურსებში იყო უამრავი ნიმუში სკაფოლდინგის მრავალფეროვანი მასალებისა, მაგრამ შევეცადე, რომ თავად შემექმნა ორიგინალური ნიმუში და მოვამზადე ვორდის ფაილი, რომელიც, ვფიქრობ, რომ ყოველთვის დამეხმარება და საინტერესო სქემაა ლიტერატურული ტექსტების კვლევისას. პორტფოლიოს ბლოგზე განთავსებით კოლეგები შევძლებთ გამოცდილების გაზიარებას და უკუკავშირს. ჩემთვისაც ყველგან ხელმისაწვდომი იქნება ჩემი ფოლდერები, შევძლებ მათ რედაქტირებას და კორექტირებას. ბლოგი, რომელიც ინტელის მესამე დონის ტრენინგზე შევქმენი, ჩემი მუდმივმოქმედი რესურსი იქნება და პროექტებით სწავლების მთელ პროცესს მასზე ყოველ სასწავლო წელს განვათავსებ.

მაკას პროექტის პორტფოლიო

ტრენინგის მეშვიდე დღე

ტრენინგის მეშვიდე დღეს სწავლების დიფერენცირება სასარგებლო და საინტერესო აქტივობაა, რათა მასწავლებელმა გაიაზროს, რომ სხვადასხვა დონის მოსწავლეთა ჩართვას და პროექტში თვითრეალიზაციას ინდივიდუალურად, მოსწავლეთა შესაძლებლობების მიხედვით უნდა მიუდგეს, რომ ყველამ შეძლოს პროექტის მოთხოვნების ადეკვატურად შესრულება. ასევე კარგი გამოცდილება მომცა პროექტის გეგმაზე სკრუპულოზურმა მუშაობამ და მის სრულყოფაზე ფიქრმა. იმედი მაქვს, რომ ეს აქტივობები პროექტებით სწავლების ოპტიმალური ფორმების მიგნებასა და განხორციელებაში დამეხმარება. მადლობა ინტელს და არაჩვეულებრივ ტრენერს - ნინო მარღიშვილს.

ტრენინგის მეექვსე დღე

ეს დღე საინტერესო და საქმიანი იყო. პროექტით სწავლების პროცესში მოსწავლის მიერ შექმნილ ნიმუშსა და მის შეფასებაზე მუშაობა მასწავლებელს ეხმარება გაიაზროს მოსწავლის საქმიანობის ასპექტები და მოიფიქროს ობიექტური შეფასების სქემები. შეფასების რუბრიკის უამრავი ვარიაციის მოფიქრება შეიძლება, მაგრამ ინტელის სახელმძღვანელოს რუბრიკების ნიმუშები დახვეწილი და ზუსტია.

ტრენინგის მეხუთე დღე

ინტელის ტრენინგი სულ უფრო და უფრო ნაყოფიერი და საინტერესო ხდება. ბლოგის დიზაინზე მუშაობამ ბევრი რამ მასწავლა. ასევე საინტერესო იყო პროექტის პროდუქტის მოსწავლისეული ნიმუშის შექმნა. მე ავირჩიე power point-ის პროგრამით შექმნილი პროდუქტი, მაგრამ ინტელის სახელმძღვანელომ მასწავლა, რომ გარდა ამისა არსებობს მულტიმედია რესურსების უამრავი ვარიაცია და შემიძლია მოსწავლეებს მრავალფეროვანი ვარიანტები შევთავაზო. ყველაზე საინტერესო ჩემთვის იყო გაზეთის შაბლონი, რომლის გამოყენებითაც შემიძლია საკლასო მუშაობის პროცესში ბავშვებთან ერთად შევქმნა ძალიან საინტერესო გაზეთები. მოკლედ რომ ვთქვა, ინტელის სახელმძღვანელოც და ეს ტრენინგიც უნივერსალური და ძალიან სასარგებლოა მასწავლებლისთვის.

ტრენინგის მეოთხე დღე

განსაკუთრებით საინტერესო და ნაყოფიერი დღე იყო. პროექტით სწავლების დროს სამუშაოს დაწყების, მიმდინარეობის და დასრულების შეფასებების ობიექტური და მრავალფეროვანი მეთოდებისა და ინსტრუმენტების ორგანიზებულად შექმნა დამეხმარება პროექტის მონაწილეთა მოტივირებაში. საავტორო უფლებების საკითხები, ვიდეოპორტალ იუთუბის მასალების ბლოგზე განთავსების შესწავლა მომცემს შესაძლებლობას, რომ გავამრავალფეროვნო ჩემი ბლოგი და დავაინტერესო ჩემი პედაგოგიური პრაქტიკითა და რესურსებით დაინტერესებული ადამიანები, რომლებიც საკმაოდ მრავალრიცხოვანნი არიან ჩემს კოლეგებს, მოსწავლეებსა და სოციალური ქსელის მეგობრებს შორის. ამაში დამეხმარება ბლოგის ორიგინალური დიზაინით გაფორმებაც, რასაც ასევე დრევანდელი ტრენინგ-მოდულის თემატიკა ითვალისწინებდა.

ქართული ხალხური ზღაპრები (1989) აუდიო წიგნი

ტრენინგის მესამე დღე

სამუშაო ნაყოფიერი იყო, ვინაიდან პროექტით სწავლების მიზნებისა და შედეგების ახლებურად და სისტემურად გააზრებას შეუწყო ხელი. მიმართულების მიმცემი კითხვებისა და ესგ-ით მისაღწევი ინდიკატორების ზუსტად გაწერა წარმატებული და ეფექტური პროექტის გარანტიაა. მასწავლებელი შეძლებს წინასწარ ზუსტად განსაზღვროს მოსწავლეთა აქტივობების მიმართულებები და სავარაუდო (მოსალოდნელი) შედეგები.
განახლებული ბლუმის ტაქსონიმიის აქტივობების გამომხატველი ზმნები დამეხმარება, რომ მრავალი კრიტერიუმით მივადევნო თვალი მოსწავლის სააზროვნო დონეებსა და მისი აქტივობების მიმდინარე პროცესებს.  ვფიქრობ, გონებრივი იერიშის კითხვების ფორმირების სავარჯიშო მნიშვნელოვან გამოცდილებას შემატებს პროექტებით სწავლებისას ჩემს საქმიანობას.

ტრენინგის მეორე დღე

ტრენინგის მეორე დღე განსაკუთრებით ნაყოფიერი იყო პროექტებით სწავლების ეტაპების გასააზრებლად. პროექტის შაბლონის, ჩეკ-ლისტის და გარკვეული მიზნობრივი ჯგუფისთვის მოსამზადებელი ბუკლეტის შექმნა არის კონკრეტული აქტივობები, რომლებიც მასწავლებელს დაეხმარება პროექტის რეალიზაციის გზაზე. გავიაზრე, რომ პროექტის ორგანიზება შესაძლებელია მრავალფეროვანი მეთოდებით, რომლებიც მოსწავლეთა მოტივაციების ამაღლებასა და საკუთარი შესაძლებლობების განვითარებაში დამეხმარება. ინფორმაციულ-საკომუნიკაციო ტექნოლოგიები იძლევა შესაძლებლობას, რომ 21-ე საუკუნის უნარ-ჩვევების შესაბამისად წარვმართოთ საგაკვეთილო და ზოგადად სასწავლო პროცესი, რაც თანამედროვე პედაგოგიკის აუცილებელი მოთხოვნაა.

ტრენინგის პირველი დღე

ინტელის ისტ ტრენინგის პირველი დღე ნაყოფიერი იყო ჩემთვის, ვინაიდან ონლაინ- სახელმძღვანელო, რომელიც შემოგვთავაზეს, დამეხმარება სასწავლო პროცესში პროექტებით სწავლების მიმდინარეობისას ინფორმაციულ-საკომუნიკაციო ტექნოლოგიების ჩართვაში.
21-ე საუკუნის უნარ-ჩვევების გაცნობა მოსწავლეებისთვის მათ გააზრებინებს საკუთარი სასწავლო აქტივობების მიზნებს, შედეგებს, თანამედროვე ტექნოლოგიების ჩართვის მნიშვნელობას, აუმაღლებს თვითკონტროლს და ობიექტურ თვითშეფასებას.
პროექტებით სწავლების ჩეკ-ლისტი და შაბლონი დამეხმარება, რომ სისტემატიზებული ფორმით, ორგანიზებულად წარვმართო მუშაობა, არ გამომრჩეს პროექტის მიმდინარეობის საფეხურები და ვაკონტროლო აქტივობების მიზნობრიობა.
ახალი ბლოგი, რომელიც ინტელის ტრენინგის პროექტებით სწავლების მოდულების პრეზენტაცია იქნება, მომცემს საშუალებას, რომ ჩემ მიერ შექმნილი პროდუქტები ორგანიზებულად მქონდეს თავმოყრილი და ამავე დროს უკუკავშირისთვის გავუზიარო მოსწავლეებსა და კოლეგებს.